破地獄：噴給靈魂聞的香水

早前生日直播介紹過呢隻香水，之後一直都覺得，好值得再用文字同大家分享一次。🙈

OCO 係一個香港香水品牌，亦曾經攞過國際香水界獎項。最令我欣賞嘅，唔單止係佢哋將香水做到國際市場，喺越南、上海、日本、泰國等地方都見到佢哋嘅專櫃，而係佢哋好重視「故事」。

每一隻香水，都唔只係「香」。

佢哋部分香氣會由調香師自己喺實驗室調配，唔係單純將現成香精混埋一齊，所以每一隻作品都有自己獨特嘅性格。

而我自己，其實一直都算係一個「狗鼻」。😂

直到二十幾歲先發現自己有長期鼻敏感，但奇怪嘅係，就算傷風塞住個鼻，我依然可以聞到好多細微嘅味道。

所以對我嚟講，嗅覺記憶係一樣好強嘅嘢。

一種味道，可能會令人突然諗起一個地方、一個人，甚至一段已經以為自己忘記咗嘅回憶。

但可能因為近年聞過太多大眾化嘅香味，我自己都開始有啲麻木。

直到遇到呢一隻。

佢嘅主題，係向電影《破．地獄》致敬，講嘅係生與死之間，「生」嗰一刻。

由死亡、火祭、靈魂離開肉體，到最後重新理解生命。

第一次聞到嗰刻，我竟然眼濕濕。

唔係因為佢有一個特別悲傷嘅味道，而係嗰一刻，好似有人突然叫我停低。

近排成個環境都唔算容易，家人健康、生活壓力、工作，仲有好多自己唔知幾時先可以真正放低嘅事情。

但嗰陣時，我竟然可以有大約半個鐘，咩都唔諗。

就只係坐喺度聞住佢。

好似有人同我講：

「辛苦你啦，停一停先。」

我突然諗起，《破．地獄》入面其實有一句好重要嘅訊息——人唔應該只係害怕死亡。

因為死亡係生命嘅一部分。

真正值得珍惜嘅，反而係我哋仲生存緊嘅每一日。

食自己鍾意食嘅嘢，去自己想去嘅地方，見想見嘅人，創造多啲值得記住嘅回憶。

好多時我哋以為「安慰」係其他人俾我哋嘅。

但人生有啲路，始終要自己行。

所以有時候，真係要自己拍拍自己個膊頭，講一句：

「辛苦你啦，我哋又捱過一日。」

只要人仲喺度，就仲有希望。

而呢隻香水，可能就係我人生第一次，令我覺得一種氣味原來可以唔只係令人聞落舒服。

佢可以提醒我——

明天，都要繼續好好生活。 🥰

希望有買到呢隻香水嘅朋友，你哋都可以感受到我嗰一刻嘅安慰。

安慰自己、明白自己、優待自己。

永遠都唔會太遲。