2026：零售行業，唔係寒冬，而係重新洗牌
2026-08-03 14:07
FAFIT有感
唔知由幾時開始，每次同供應商傾偈，話題總會由新品、訂單，慢慢變成：「最近市道真係差咗好多。」
有時花粉上嚟拎貨，未開始傾貨，反而先講起自己盤生意、公司裁員，或者附近又有邊間舖頭結業。
我哋日日返工放工都會經過樓下宏開道。以前成條街好熱鬧，而家一路行，一路見到「吉舖招租」、「結業清貨」嘅招牌。一間執完又一間，連開咗好多年嘅銀行分行都陸續撤走。望落去，真正愈開愈多嘅，好似只剩低兩餸飯。
作為呢幾年先開業既我地，見到呢啲畫面，心情多少都會有啲複雜。
但如果你問我，2026 年零售最真實嘅感受係咩？
我反而覺得，唔係生意愈來愈難做，而係以前有效嘅方法，開始失效。
今年嘅零售市場，比起「寒冬」，更加似一場大型洗牌。
街上依然有人流，商場依然唔算冷清，但成交未必跟得上。以前靠旺場帶動生意，今日已經唔再係必然。好多人會行、會睇、會比較，甚至即場上網搜尋評價，但真正願意付款嗰一步，反而比以前更加謹慎。
消費者唔係冇消費能力，而係開始問自己一句：「呢樣嘢，真係值得我買嗎？」
以前可能因為品牌、廣告，甚至一時衝動就落單；而家更多人會比較價格、研究功能、睇真實用家分享，再決定值唔值得買。
所以，我一直都唔太認同「市道差就一定冇生意」呢個講法。
市場一直都有需求，只不過需求開始集中喺真正有價值、有特色，或者能夠解決問題嘅產品同服務。如果產品同其他人冇分別，只係靠減價吸客，最後好多時只會跌入價格戰，愈做愈辛苦。
對創業者嚟講，最值得思考嘅，已經唔係「點樣賣多啲」，而係點樣令客人覺得，非你不可。
有人開始建立品牌，有人拍短片分享專業知識，有人做好售後服務，有人經營社群。表面睇似乎各有各做，但其實大家都係做緊同一件事——建立信任。
因為當市場愈成熟，信任，先係最值錢嘅競爭力。
2026 年，零售行業確實變咗，但我反而覺得，呢場洗牌未必係壞事。佢淘汰咗只靠運氣、只靠流量嘅經營模式，同時亦畀真正願意持續學習、了解客人、建立品牌嘅創業者，一個重新出發嘅機會。
風水輪流轉，但機會，永遠留畀願意改變嘅人。